ЛЕБЯЖЬЕ МҰНАЙ КЕН ОРНЫ
Лебяжье кен орны Каспий теңізінің жағалауында, Каспий маңы бассейнінің Оңтүстік Ембі аймағында орналасқан.
Кен орнын игеру жобасы 2026 жылдың I тоқсанында бекітілді. Бекітілген жобаға сәйкес қолданыстағы сынақ пайдалану объектілерінің қуаты кен орнын өнеркәсіптік пайдалануға қажетті деңгейге дейін ұлғайтылады. Сондай-ақ қосымша бағалау жұмыстарын жүргізу жоспарланып отыр. Мұнайды өнеркәсіптік өндіруді бастау 2027 жылдың II тоқсанына жоспарланған. Өндірудің нысаналы деңгейі тәулігіне 150 тоннаға дейін жетеді.
ВОСТОЧНЫЙ МУНАЙБАЙ – БАХЫТ МҰНАЙ-ГАЗ-КОНДЕНСАТТЫ КЕН ОРНЫ
Восточный Мунайбай – Бахыт кен орны Лебяжье кен орнынан оңтүстік-шығысқа қарай 30 км жерде орналасқан. Кен орнын игеру бес жылдық кезеңге есептелген және Восточный Мунайбай мен Бахыт құрылымдарына тиесілі газ-конденсатты және мұнайға қаныққан қабаттарды кезең-кезеңімен игеруге енгізуді көздейді.
Кен орнын игеру жобасы бекітілді. Мунайбай – Бахыт кен орнындағы өндіру кезеңі 2025 жылғы маусымнан 2048 жылғы наурызға дейін белгіленген. Бахыт құрылымының T-II құмтас қабатынан газ бен газ конденсатын өндіруді бастау 2026 жылдың IV тоқсанында күтіледі. Кейіннен қалған өнімді қабаттарды дәйекті түрде игеру көзделген.
Мунайбай кен орнындағы жерүсті объектілері мен инфрақұрылым құрылысы екі кезеңмен жүзеге асырылады.
I кезең (2024-2026 жж.)
Мунайбай кен орнының Бахыт учаскесіндегі жерүсті объектілері мен инфрақұрылым құрылысы:
- Учаскеде өндіруші ұңғымалар қосылатын кәсіпшілік газ жинау станциясы салынады. Газ жинау станциясынан шикі газ диаметрі 8 дюйм (20,32 см), ұзындығы 22 км болатын жаңа газ құбыры арқылы «Толкын» газ өлшеу станциясына жеткізіліп, одан әрі үшінші тараптың газ өңдеу зауытына бағытталады. Өңдеуден кейін тауарлық газ Боранкул станциясы ауданындағы «QazaqGaz» ҰК» АҚ газ тасымалдау жүйесіне беріледі.
- Бахыт учаскесінде газ бен газ конденсатын өндіруді бастау 2026 жылдың IV тоқсанына жоспарланған.
- Газ бен газ конденсатын өндірудің болжамды ең жоғары деңгейлері тиісінше тәулігіне 0,540 млн м³ және тәулігіне 165 тоннаны құрайды.
II кезең (2026-2028 жж.)
Мунайбай кен орнының Восточный Мунайбай учаскесіндегі жерүсті объектілері мен инфрақұрылым құрылысы:
- Восточный Мунайбай учаскесінде өндірілетін қышқыл газды өңдеу үшін жаңа кешенді газ өңдеу зауыты салынады. Бастапқы кезеңде жоба тоғыз өндіруші ұңғыманы екі газ жинау жүйесіне қосуды, газ өңдеу зауытында газды дайындаудың толық циклін және тауарлық газды жаңа газ құбыры арқылы Боранкул станциясының маңындағы «Опорный» терминалы ауданында орналасқан «QazaqGaz» ҰК» АҚ газ тасымалдау жүйесіне беруді көздейді.
- Тұрақтандырылған газ конденсаты Восточный Мунайбай учаскесінің объектілерінен автокөлікпен үшінші тарапқа тиесілі «Опорный» терминалының мұнайды сақтау және айдау станциясына тасымалданады. Терминалда конденсат теміржол цистерналарына тиеледі немесе ішкі нарыққа және экспортқа жеткізу үшін «ҚазТрансОйл» АҚ магистральдық мұнай құбырлары жүйесіне айдалады.
- Восточный Мунайбай учаскесінде газды, газ конденсатын және мұнайды өнеркәсіптік өндіруді бастау 2030 жылдың IV тоқсанына жоспарланған.
- Газды, газ конденсатын және мұнайды өндірудің болжамды ең жоғары деңгейлері тиісінше тәулігіне 1,7 млн м³, тәулігіне 380 тонна және тәулігіне 552 тоннаны құрайды.